La PLD.Ils Liberals Grischun es satisfatta da l‘orari da la regenza reguard las decisiuns dal pövel. Sco chi resorta da la communicaziun da la regenza prevezza quella duos fasas cun duos votumaziuns popularas per la candidatura gös olimpics d’inviern 2026.
La prüma votumaziun varà lö als 12 favrer 2017. Il pövel gnarà dumandà sch’el va daperüna cun ün credit da 25 milliuns per parderdscher la candidatura. Ouravant sto trattar il cussagl grand la fatschenda. El farà quai in sia sessiun da december. Las PLD sustegna l’idea dals gös olimpics e pretenda cha las regiuns e’ls cumüns vegnan integrats amo plü ferm aint illas lavuors da basa. Scha la populaziun disch da schi, lura saraja eir güstifichà da dar liber ils cuosts da planisaziun
Implü saja important da tour in mans fingià uossa las lavuors preparatoricas per la seguonda votumaziun 2018 areguard il proget definitiv in plaina transparenza.
La PLD Grischun craja positivamaing chi saraja pussibel da persvader la populaziun grischuna da l’attractività e da las consequenzas positivas, urgiaintamaing bsögnusas, d’üna candidatura. Important es ün proceder fair e trasparent integrand ils cumüns quai chi ha mancà tschella jada. A la populaziun esi da muossar cha üna tala candidatura haja avantags. Tenor la PLD faja dabsögn cha’ls lös previs pels gös olimpics as pronunzchan bainbod per üna candidatura.
Als respunsabels giavüscha la PLD bler success e persistenza cun quist orari ambizius gös olimpics d’inviern 2026. La PLD in mincha cas es da la partida!
Silvio Zuccolini, chef da pressa