In quists dis es gnü trattà manüdamaing illa „Südostschweiz“ ün’incumbenza da la fracziun PPS cul titul „Heimatschutz für Bündner Firmen“ Tuot quai tenor la PLD Grischun in ün möd ter polemic, perche ils imbüttamaints a la regenza grischuna passan sper il böt via. Da che as tratta? La confederaziun ha, a partir da l’an chi vain, la pussibiltà da verer eir sül nivo dals predschs dal pajais d’ingionder chi vain la ditta, schi’s tratta da congualar ils predschs. Quai dà ün congual real e las impraisas indigenas nu sun dischavantagiadas da prüm davent
Uossa as fa l’imbüttamaint a la regenza grischuna ch’ella “nun haja plü ingün sentimaint per la mansteranza grischuna.“ Ma la regenza nun ha dit nöglia fin uossa. As fat dudir ha la conferenza svizra dals directurs chantunals da fabrica e quels han critichà la chosa in fuond güstifichada our da motivs giuridics
La PLD as mett’aint per üna concurrenza faira. Ella es persvasa cha las dittas grischunas nun han d’avair temma da quella. La regenza ha da muossar cha la publicaziun da las lavuors po gnir fatta uschè cha la mansteranza grischuna nun es dischavantagiada. L’acquist public es hozindi ün factur essenzial per las firmas indigenas. Tant daplü voula la listessa basa per tuots.
La PLD pretenda da la regenza grischuna da nüzziar oura il spazi d’acziuns ch’ella ha e da sustgnair la politica da la confederaziun. Quai chi vala al nivo federal dess valair eir i’l chantun. Alch oter füss irrespunsabel e nu serviss l’interess da l’economia e mansteranza grischuna. La regenza es damaja clomada d’agir.
