PLD: Schmetter cul chaprizi da proporz – respectar a la fin la voluntà dal pövel
Ouravant saja constatà: Il pövel grischun s’ha express ot jadas cunter ün müdamaint dal sistem d’elecziuns e cun quai cunter il proporz. Malgrà quai nu schmettan ils aderents dal proporz d’imnatschar cun ün plant ulteriur pro las prosmas elecziuns dal cussagl grand.
D’incuort ha refüsà il tribunal federal ün plant da singulas persunas e da la PPS grischuna areguard il modus d’eleger il cussagl grand sün via dal proporz. Il tribunal federal ha sustgnü cun quai la decisiun dal tribunal d’administraziun chantunal chi nun es entrà sül plant cun la motivaziun cha quel saja gnü inoltrà massa tard.
La PLD.Ils Liberals Grischun es satisfatta da la decisiun dal tribunal federal da brich entrar neir el sül plant.
Eir il tribunal plü ot sustegna damaja quai cha’l pövel grischun ha fat bun fingià ot jadas. Adüna darcheu ha express il suveran sia voluntà da restar pro’l sistem actual. Eir las chambras federalas han fat bun il sistem da majorz. In decisiuns ulteriuras ha dit il tribunal federal plüssas jadas cha tant il sistem da proporz sco quel da majorz sajan cumpatibels cun quai cha la constituziun svizra vöglia.
La PLD.Ils Liberals grischun sperescha cha quista voluntà dal pövel e las duos decisiuns dal tribunal chantunal e quel federal vegnan uossas acceptadas da tuot las partidas e chi nu vegna adaquella cha güdischs sforzan tras ün sistem d’elecziuns cha’l pövel nu voul. Chi chi metta adüna la voluntà dal pövel al plü ot stuvess far quai eir scha quella voluntà nu til plascha üna jada. Amo plü grotesc füssa, scha güsta quels chi refüsan adüna ils güdischs esters, cuorrissan uossa pro’l güdisch europeic dals drets d’umans per agüd.
Silvio Zuccolini, Pressechef