La PLD Grischun deplorescha la decisiun dal cussagl naziunal d’acceptar l’iniziativa per sgürezza alimentara. Quella voul integrar illa constituziun definiziuns chi existan fingià. Tenor l’artichel previs stuvess rinforzar la confederaziun il provedimaint da la populaziun cun vivandas our da producziun indigena variada ed insistenta. La PLD nun es cunter quist böt, ma propuona otras vias per til ragiundscher.
La PLD sustegna chi’s rinforza la sgürezza alimentara, ma brich la reglamentaziun schmasürada, colliada cun quai. L’iniziativa da la società svizra dals paurs voul cumplettar la constituziun tras definiziuns chi in fuond sun fingià avant man. L’artichel 104 da la constituziun dà fingià üna basa solida per ün provedimaint stabel da la populaziun tras üna producziun agricula indigena ed üna politica agrara coerenta.
La Svizra ha üna sgürezza alimentara fich ota
Per la PLD.Ils Liberals Grischun esa important chi nu vain cumbattü al fos lö. La sgürezza alimentara es fingià fich ota in nos pajais. I’s survain las vivandas dapertuot ed in ün möd chi cuverna ils bsögns. I nu’s das-cha applichar ün protecziunissem agrar exagerà. L’agricultura survain minch an 3,8 milliardas da francs da la confederaziun. La producziun indigena ha ragiunt ils ultims ans be cifras da record.
Paurs sun exposts a sfidas remarchablas i’l futur. La PLD es consciainta dal fat cha la perdita da spazis agriculs dannagescha il svilup insistent e la producziun da vivandas in Svizra. Ils pissers da la populaziun areguard ils spazis agriculs e lur protecziun sun bain chapibels. Ma quista protecziun es già datta tras l’artichel 75 da la constituziun. E quella es gnüda amo confirmada tras la revisiun da la ledscha reg. la planisaziun dal territori, fatta buna dal pövel 2013.
Quai sun motivs avuonda per refüsar l’iniziativa schmasürada e la PLD Grischun cussaglia plütost da cuntinuar cun las refuormas da la politica agrara 2014 – 2017.
Silvio Zuccolini, chef da pressa