Fracziun PLD.Ils Liberals a Cuoira – Examinar las incumbenzas es urgiaint. Il güdisch chantunal dà da discuorrer.
Marcurdi, als trais da gün ha pardert la fracziun PLD.Ils Liberals la sessiun da gün. Vis la situaziun speciala ha’la fat quai aint illa sala dal cussagl grand. La presidenta Vera Stiffler ha manà la sezzüda, preschaint d’eira eir il vicepresident dal cussagl grand, Martin Wieland.
Al cumanzamaint d’eiran las ordonanzas urgiaintas COVID-19 e’ls credits urgiaints ill’otezza da 93 milliuns sülla glista da tractandas. Tuot es gnü fat bun, ma i ha dat dumandas ed annotaziuns pro documaints e decisiuns divers.
Il rendaquint 2019 e’l rapport 2019 han chattà bun’accoglientscha. Il rendaquint cun ün vanz operativ da 115.5 milliuns es fich salüdaivel. Ma i füss il foss mumaint per pretender uossa sortidas suplementaras. Al cuntrari: L’examinaziun da las incumbenzas, postulada fingià daspö 2015 es plü urgiainta co mai. La fracziun nu po incleger cha la regenza metta quai darcheu inavo. I’s sa già uossa chi darà damain impostas 2021 ed pervi da Corona amo damain – nair’ura dimena dad ir vi da quist’examinaziun.
Malavita s’haja stuvü trattar eir ils problems divers pro’l güdisch suprem, il güdisch chantunal. La fracziun es gnüda infuormada manüdamaing dals commembers da la cumischiun per güstizia e sgürezza sur da lur lavuors fich cumplessivas. Id es impreschiunant che cha quista cumischiun, trand pro amo experts, ha elavurà. Davo discussiun manüda ha tut la fracziun cugnuschentscha da la via proposta per las elecziuns dal güdisch, quai in sen positiv. La pretaisa dal president dal güdisch cha tuot ils commembers da la cumischiun nu possan sezzer es gnüda refüsada unanimamaing. Unisono es gnü dit cha’l dan da reputaziun saja immens, per il chantun sco per il güdisch. I saja da far remedura il plü svelt pussibel. Almain hajan constatà ils duos experts , chi han examinà la muntagna da lavur brich fatta e la dürada dals proceders, chi nu detta sbagls plü grands, oter cha’l actuariat nu saja dotà avuonda e chi vöglia güdischs ad hoc fin cha ils cas sajan lavurats sü
Implü es gnüda trattada la revisiun parziala da la ledscha reg. La promoziun economica e bleras propostas parlamentaras.
Silvio Zuccolini, chef da pressa PLD.Ils Liberals Grischun
