I d’eira il prüm inscunter dals seniors PLD in quist an. La PLD.Ils Liberals Grischun tils vaiva invidà per üna visita da l’ARGO, l’ufficina protetta a Cuoira. Blers seniors our da tuot il chantun s’han partecipats a quist evenimaint tradiziunal.
D’incuort ha gnü lö a Cuoira ün dals inscunters tradiziunals da la PLD.Ils Liberals Grischun per ils seniors da la partida. Homens e duonnas s’han reunits per üna visita da l’ARGO, l’ufficina protetta. Rudolf Oertle, Razen, respunsabel per quists evenimaints in nom da la suprastanza da la partida, ha organisà eir quist davomezdi.
Il manader da l‘ARGO, Franco Hübner ha salüdà ils preschaints e dat il bivgnaint. Insembel cun el d’eiran preschaints da l’ARGO da Cuoira: Roland Kallen, manader da la vendita, Gieri Vinzens, manader da l’ufficina, e Franz Demarmels, manader producziun. Quels trais han lura manà ils seniors in gruppas tras l’impraisa ARGO. Ils visitaduors d’eiran impreschiunats da tuot quai ch’els han vis e dudi. Ils collavuratuors motivats e’ls impedits in lur chüra in diversas partidas da la producziun. La mera da la fuondaziun , nempe l’integraziun sociala da creschüts aint illa vita da manster, vain realisada in möd exemplaric, quai s’haja vis quel davomezdi.
La seguonda part dal davomezdi d’eira dedichada a l’inscunter pachific aint il Motel Sommerau, ingio cha ils mandataris da la partida han dat infuormaziuns our da prüm man
Cusglier da stadis Martin Schmid ha rapportà da la chasa federala. Il cusglier guvernativ Christian Rathgeb, nouv aint il departamaint da finanzas s’ha stuvü s-chüsar pervi d’üna collusiun da termins , la presidenta da la fracziun, grandcusgliera Vera Stiffler ha quintà da la lavur da la fracziun aint il cussagl grand. Il president da la partida Bruno Claus ha tut posiziun areguard las tschernas venturas aint il cussagl naziunal. Là esa da cumbatter per guadagnar inavo il sez chi’d es i pers avant quatter ans. El ha appellà als seniors da dar a la glista il sustegn necessari.
Davo quist prüm inscunter, manà tras cun success es planisà quist an amo üna visita pro la REGA a Vaz suot. Quists inscunters sun üna part importanta da la lavur da la partida. Quist sectur da la populaziun gioda l’attenziun dal comitè da la PLD ed el guardarà eir aint il futur cha quist incumbenza gnarà cuntinuada.
