Il rectur da la HTW, Jürg Kessler, ha dat il bivgnaint persunalmaing ed ha spiegà a man d’üna preschantaziun video impreschiunanta co cha la scoula s’ha sviluppada, sia situaziun actuala e sia actività aint ils differents secturs da la fuormaziun. Quai es gnü illustrà lura dad oters commembers da la direcziun. Martin Studer ha trattà la digitalisaziun, ün tema prioritari per la direcziun, Josef Walker lura ha referi davart la perscrutaziun i’l sectur da la digitalisaziun. Sparti sü in trais gruppas as pudaiva lura visitar ils secturs tecnica/fotonics, SIL/infuormaziun, labor da construcziun. Dapertuot cun experimaints infuormativs ed interessants.
Sco üsità d’eira dedichada la seguonda part dal davomezdi ad infuormaziuns politicas ed a la cumpagnia, quai illa mensa da la HTW: Cusglier guvernativ Christian Rathgeb, ha infuormà da las lavuors in seis departamaint ed illa regenza e quintà dal cumbat electoral actual, cusglier da stadi Martin Schmid ha dat üna survista da la sessiun a Berna e las fatschentas actualas da las chambras federalas.
Preschainta d’eira eir la cheffa da la fracziun, grandcusgliera Vera Stiffler, chi ha orientà da las lavuors da la fracziun. Ella s’ha muossada persvasa chi sarà pussibel da mantgnair il status da la fracziun la plü granda aint il cussagl grand, vis las bleras candidaturas da qualità.
Eir inavant voul s’occupar la PLD.Ils Liberals Grischun da quista gruppa da la populaziun e tilla spordscher evenimaints interessants ed infuormaziuns da prüm man. La prosma jada sarà quai il cas l’utuon chi vain.
Silvio Zuccolini, chef da pressa