La PLD.Ils Liberals Grischun salüda la pretaisa da la regenza Grischuna cha la via naziunala A 13 survegna ün tunnel da sgürezza e brich be üna gallaria da sgürezza sper Giuvaulta.
La regenza ha tut posiziun areguard il proget da realisaziun dal departamaint federal d’ambiaint, traffic, energia e communicaziun per la sanaziun da la A 13 tanter Giuvaulta e Vial. I’s tratta da la renovaziun dal tunnel Isla Bella e la construcziun d’üna gallalra da sgürezza parallela. Previs sun ses ans da construcziun, inclus la renovaziun dal tunnel Plazzas e da la via tanter ils access.
Aint in sia posiziun pretenda uossa la regenza da construir invezza d’üna gallaria ün tunnel da sgürezza cun il diameter d’üna via naziunala. Fand uschè as pudess, schi fess ün di dabsögn, lura realisar ün seguond tunnel da via naziunala. Ed implü as pudess dovrar quel tunnel dürant la sanaziun dal tunnel existent d’Isla Bella
Tenor la PLD Grischun es quista pretaisa güstifichada, orientada vers il avegnir, e anticipescha ün adöver futur. La via naziunala A 13 es la via principala in direcziun da bleras destinaziuns grischunas da vacanzas e sper la via dal San Gottardo l’axa da traffic la plü importanta in Svizra tanter nord e süd. Fabrichar oura quist’axa sün quatter vials fess dabsögn daspö blers ans, impustüt per augmentar la sgürezza da traffic. Ils accidaints numerus sün quel traget documenteschan quai in maniera impreschiunanta.
La PLD.Ils Liberals Grischun sperescha cha Berna inclegia la pretaisa güstifichada e radschunaivla dal Grischun.
Silvio Zuccolini, chef da pressa PLD.Ils Liberals Grischun