Ün desaster per il aderents
Ils votants e las votantas grischuns han refüsà cleramaing l’iniziativa NO Billag, amo plü cleramaing co la Svizra. La PLD constatescha quai cun satisfacziun. Il chantun Grischun triling ha realisà l’importanza da quista proposta. Eir ils respunsabels da la SRG han manifestà ün ingaschamaint enorm infuormand da l’importanza e las consequenzas da l’iniziativa.
La partecipaziun a l’urna es statta fich ota, malgrà la critica exprimida visavi la SRG. Ün müdamaint da tal gener pro la finanziaziun nu vess gnü be consequenzas per la SRG, ma eir per 34 staziuns regiunalas da radio e televisiun. Impustüt las regiuns da muntagna e quellas da la periferia vessan pati fermamaing. In Grischun füss quai stat la chasa da medias SOMEDIA chi füss statta tocca in maniera decisiva. Ella sarà cuntainta da l’esit da la votumaziun.
Id es uossa l’incumbenza da la SRG e dal cussagl federal da far üna revisiun per cha la SRG possa dvantar plü effiziainta eir cun damain raps. Quai chi’d es gnü impromiss ils ultims mais sto uossa gnir realisà. Cha la direcziun generala ha preschantà fingià la dumengia propostas in quista direcziun es per la PLD Grischun ün bun signal.
Esit fich cler per la prolungaziun da l’uorden finanzial
Bod ün pa illa sumbriva da la proposta NO Billag es gnü decis amo plü cleramaing la decisiun federala per la cuntinuaziun da l’uorden finanzial. Ün NA vess gnü copnsequenzas desastrusas per la confederaziun. Ella füss statta sainza mezs suffiziaints a partir dal 2021. Quistas cumpetenzas da trar aint impostas sun uossa gnüdas prolungadas ma limitadas temporalmaing, uschè cha’l stadi sto as disciplinar areguard sias spaisas.
Silvio Zuccolini, chef da pressa