La PLD fa las seguaintas dumandas criticas:
- Che intraprenda la regenza, che pass concrets s’haja fingià instradà, chi fa quels e che oters pass seguiran?
- Chi maina las investigaziuns e chi surpiglia la respunsabiltà per quellas? La regenza svessa o la cumischiun sindicatoria dal cussagl grand o üna cumischiun speciala d’investigaziun? Hozindi nun es amo pussibel da respuonder quai, ma fin la sessiun da gün sto quai esser cler.
- Che rolla giovaiva l’uffizi chantunal da construcziun bassa?
- Che savaivan ils singuls cusgliers guvernativs e perche s’haja taschü, scha quai mâ vess dad esser?
- As pretenda chi vegna pajà inavo?
- Co as poja evitar cha ün tal scandal as repeta?
- Chi investighescha l’istorgia da l’impresari d’Engiadina Bassa chi ha miss in movimaint tuot quista chosa?
Dumandas e dumandas e tuottas stuvessan gnir respusas il plü svelt ed il plü bain pussibel. Il chantun Grischun e las persunas chi pajan impostas, chi han subi dans enorms tras predschs schmasürats han il dret cha quist scandal vegna scleri in tuot ils detagls e chi regna transparenza. Da dir, cha tuot sajan be fake news sco cha l’associaziun grischuna dals impresaris ha fat quai, es bod cinic e dal tuot malplazzà. Il dan da reputaziun per il chantun da turissem Grischun es immens.
Silvio Zuccolini, chef da pressa