La PLD.Ils Liberals piglia posiziun areguard duos dumandas importantas da la politica da finanzas grischuna, il preventiv 2018 dal chantun ed ils rimprovers dals socialists cunter la Repower
La PLD es satisfatta cha la regenza voul tgnair las finanzas chantunalas i’l equiliber. Ella prevezza ün deficit da 23,2 milliuns (sumgliaint a l’an avant), lascha la quota statala a 14,8 %, fa quint cun üna creschita dad ün pertschient (l’an avant 0,8%) e voul augmentar las investiziuns netto e brutto.
Vis la politica d’impostas as poja dir cha’l quint va sü. Las reducziuns da l’imposta per persunas giuridicas, postuladas da la PLD, d’eiran güstifichadas. Malgrà la reducziun s’han augmentadas las entradas.
La PLD pretenda uossa cha la regenza preschainta immediatamaing üna planisaziun impegnativa per seis concept da finanzas stabilidas eir sün lunga vista.
La PLD nu po incleger cha la regenza nu vezza la necessità per masüras da spargn e voul spettar cun quellas fin 2019. Da metter in pratcha las masüras saraja üna lavur per ans e perquai saja da cumanzar uossa cun quellas.
La PS fa rimprovers a la Repower ed a la regenza grischuna e pretenda ch’ella saja l’unica partida chi haja fat attent a quista problematica. Quai nun es correct, la PLD s’occupa da quai daspö 2012. Ella ha critichà fermamaing la partecipaziun ota pro’l chapital d’aczias ed eir la reducziun da la valur da quellas. Quai va sün cuost da quels chi pajan impostas. La PS invezza ha adüna sustgnü las investiziuns chantunalas e la cumprita d’aczias. Cha’l chantun in ün champ plain ris-chs, agescha sco acziunari grand, mai nun ha chattà l’acconsentimaint da la PLD, ma quel da la PS.
La dumanda parlamentara da la PS ed ils votums polemics davo la resposta da la regenza sun spüra propaganda avant las tschernas. Quai fa dan a la Repower, e cun quai als pajaders d’imposta e metta in privel las plazzas da lavur giò’l Puschlav. La PLD sustegna la strategia da la Repower e sperescha cha la ditta as remetta, a favur da l’economia grischuna e da las plazzas da lavur.
Il facit da tuot quai es alch cha la PLD disch daspö blers ans: Marchà cun aczias e cumprita da partecipaziuns nu fan part da l’agir central dal chantun, ma sun da laschar aint ils mans dals privats. Il stadi e l’economia privata han lur incumbenzas separadas. I nu va bain sch’ün surpiglia ils affars da tschel.
Silvio Zuccolni, chef da pressa