Davo üna schleppa grandiusa, almain per las relaziuns in Grischun, ed ün’intervenziun in chosas operativas da la lobby grischuna da cultura ha trat inavo il chef dal departamaint, Martin Jäger sia decisiun: La directura installada avant las vacanzas da stà – suot circunstanzas misteriusas – nu d’eira plü directura. Per gnir a bröch cun la chosa faiva dabsögn da clamar in agüd ün moderatur exteriur. Uossa, be ün mais plü tard, s’haja proclamà cun superbgia in üna granda conferenza da medias chi s’haja chattà üna soluziun ideala „portada da tuots“.Tuottas duos persunas respectivas as partischan il post da directur. La dumanda: Pajan ils Grischuns uossa duos pajas da directur o renunzchan quels duos sün la mità? Nu vess pudü chattar quista soluziun straordianria il chef dal departamaint svess? Ed ingio es uossa, quai la dumanda da la PLD, la differenza da la prüma soluziun chi ha manà a las protestas massivas? L’unica differenza visibla es il fat cha’l directur destitui as po clamar inavant Co-directur, insembel culla Co-directura.
Quels chi pajan impostas varan plaschair. Implü nu’s verifichan pel solit talas soluziuns cun respunsabiltà partida e bleras colliaziuns pac cleras. I’s po be spettar las prosmas demonstraziuns!
Quista acziun ridicula estiva maina cun sai la dumanda che chi sun las qualitats da management pro’l manader dal departamaint e sia glieud. I’s po sainz’oter discuorrer chi’s bütta ils raps our da fanestra e chi’s douvra las ressursas chantunalas per nöglia. Tuot l’agitaziun per nöglia as vess pudü evitar tras üna gestiun cumpetenta e tras decisiuns cleras, transparentas e chapiblas.
Silvio Zuccolini, chef da pressa