La PLD.Ils Liberals Grischuna ha prendì posiziun davart la consultaziun en connex cun la planificaziun territoriala ed urbanisaziun.
Generalmain porscha quella ina basa fundada areguard l’adattaziun dal plan directiv territorial dal chantun. La PLD pretenda dentant en general ch’il rom definì da la lescha davart la planisaziun dal territori per il chantun Grischun (LPTGR) na vegnia betg restrenschì pli ferm. Là nua che spazi d’agir è avant maun, duai el vegnir nizzegià.
Spazis d’agir vesa la PLD sco impurtanta part en la realisaziun da la planisaziun dal territori. Ella è d’accord cun la valitaziun che la dinamica ed il svilup prospectiv vegn a divergiar en las differentas regiuns dal chantun Grischun. La PLD deplorescha dentant il tun pulit resignond pertutgant il svilup en las regiuns ruralas.
Areguard il svilup dals abitants è la PLD.Ils Liberals Grischuna da l’opiniun, ch’i dettia vischnancas en il chantun Grischun nua ch’ina extensiun dal traffic public na stettia betg en relaziun cun las expensas. E quai per raschuns tecnicas sco era finanzialas. Il traffic public sco suletta mesira d’access è en quest cas nuncuntentaivel.
Davart l’actuala politica funsila è la PLD da l’opiniun ch’ils dretgs da proprietad fan part dals pilasters da noss urden statal che na dastgan betg vegnir limitads. Per quest motiv refusescha la PLD.Ils Liberals Grischuna ina politica funsila activa ed extensiva. Ina tala duai mo esser pussaivla per impedir ina accumulaziun da terren da construcziune mobilisaziun da reservas d’utilisaziun per terrens pli gronds, e quai mo sch’i regnia in relevant interess public. Quest aspect è da discutar e vala segir a partir d’in per milli m2. Las cundiziuns da basa èn da definir per l’entir chantun unifitgadamain.
Cun la sistematica da la dezonaziun proponida na va la PLD betg d’accord. Quella na satisfa betg. La metodica unilaterala da top-down è ord vista liberala da refusar. Enstagl da quintar sulettamain mo cun zonas da planisaziun, fissi da proponer models alternativs che promovan flexibladad, atgna iniziativa ed autonomia communala. La PLD pensa ad in sistem da commerzi che permetta la cumpra e vendita da zonas da bajegiar. Ord vista interchantunala cuntanscha quest model la finamira giavischada. Nua che questas cumpras e venditas han finalmain lieu è tenor la PLD secundar. Sco agid da finanziaziun vesa la PLD in fond alimentà entras il chantun. Zonas da planisaziun èn lura mo sco ultima ratio necessarias.
Silvio Zuccolini, chef da pressa