Il cussagl federal ha miss in consultaziun quist’eivna la revisiun da la ledscha reguard ils drets d’aua. Üna supraisa negativa immensa per il chantun Grischun. Il cussagl federal propuona üna soluziun transitoria per ils ans 2020 fin 2022: Redüer ils fits d’aua d’ün maximum da 110 francs per kilowatt sün 80 francs. Dal 2023 davent stuvess lura valair ün model flexibel: Ils fits d’aua consistessan our d’üna part fixa e d’üna part tenor il predsch d’energia dal marchà. Co cha quist model vess da verer oura i’ls detagls nun es amo cler, illa missiva per la consultaziun sun skizzats be ils puncts principals, tuot tschai gniss lura plü tard.
Cha quista soluziun darà amo da discuorrer es subit cler. La PLD Grischun sperescha cha la regenza grischuna pigliarà posiziun cleramaing. Fits d’aua sun essenzials ed existenzials per blers cumüns dal chantun. Da redüer sco cha’l cussagl federal propuona per 28 perschient, pel Grischun tantüna raduond 35 milliuns da francs, nu das-cha gnir acceptà. Eir il model definitiv cun la spartiziun tanter üna part fixa e tschella flexibla sto gnir analisà manüdamaing. Fintant cha’l parlamaint nu preschainta ün model nouv dal marchà d’electricità nu’s das-cha gnanca discuorrer d’üna reducziun dals fits d’aua, uschè il maniamaint da la PLD Grischun.
Silvio Zuccolini, chef da pressa