La protecziun dals cunfins grischuns survain lod e sustegn dal cusglier federal
Cun plaschair ha dudi la PLD.Ils Liberals Grischun cha cusglier federal Ueli Maurer e cusglier guvernativ Christian Rathgeb s’han inscuntrà illa regiun dal Bernina. I han visità üna controlla mobila da la pulizia chantunala e da las guardgias dal cunfin e’l dazi. Dürant quella visita ha confirmà cusglier federal Maurer cha’l numer da las guardgias dal cunfin resta süll’otezza actuala. Cusglier guvernativ Rathgeb vaiva protestà fermamaing cunter la centralisaziun da la persecuziun da dazi a Berna. Cusglier federal Maurer sco eir il directur superiur da dazi Christian Bock han confirmà cha las plazzas vacantas vegnan darcheu occupadas e cha la communicaziun cun chantun e cumüns vegna megldrada.
La PLD mantegna la pretaisa da la regenza grischuna, basada sün ün’incumbenza parlamentara da grandcusgliera Brigitte Hitz. Quista iniziativa da stadi pretenda d’augmentar il numer dals guardgiacunfins. Be uschè possa gnir sgürà la flexibilità necessaria per la protecziun dals cunfins. La PLD Grischun sperescha cha la cumischiun dal cussagl da stadi reponderescha seis Na in quista fatschenta. La PLD es cuntainta cha la cooperaziun tanter la pulizia chantunala e la sgürezza militara vegna examinada uossa in detagl, sco chi’d es gnü dit tant da cusglier federal Maurer sco da cusglier guvernativ Rathgeb.
