Insembel cun las vals talianas gratulescha la PLD.Ils Liberals Grischun
ad Ignazio Cassis per sia tscherna sco cusglier federal
|
La PLD.UIls Liberals Grischun s’allegra fich da la tscherna d’Ignazio Cassis, cusglier naziunal e chef da la fracziun PLD aint il cussagl federal. Ella partischa la cuntaintezza da las vals talianas dal chantun. Las chambras federalas han dat ün segn da concordanza e da la solidarietà naziunala. Cun Ignazio Cassis, rapreschantant da l’italianità, ed uschè eir da l’italianità in Grischun vain üna persunalità aint il cussagl federal chi sgüramaing praistarà üna contribuziun importanta per gnir a bröch cun las sfidas dal pajais. Insembel cun i grigioni italiano gratulescha la PLD.Ils Liberals Grischun ad Ignazio Cassis per quista tscherna e til giavüscha success e satisfacziun in quist uffizi. Ella ingrazcha a cusgliera naziunala Isabelle Moret e cusglier guvernativ Pierre Maudet per lur candidaturas loialas ed impreschiunantas
La persunalità d’Ignazio Cassis vain stimà sur sia partida oura. Sia experienza lunga, sia suveranità e sia forza da persvader insembel cun sia vöglia da viver la colleghialita e la concordanza, e sia fiduzcha illas instituziuns da nos pajais han persvas las chambras federalas.
Sias cumpetenzas ha demonstrà Ignazio Cassis tras sia lavur lunga sco cusglier naziunal (daspö 2007) e sco president da la fracziun (daspö 2015) . El cugnuoscha ils dossiers a fuond, el sa manar, el es integer e colleghial. Seis ingaschamaint sco meidi chantunal, sia cumbatta cunter AIDS e sia lavur per ün sistem da sanità d’ota qualità e listess finanziabel muossa ch’el s’ingascha cun corp ed orma ed es pront da servir al pajais e sia populaziun.
Ils ultims mais davo cha cusglier federal Burkhalter ha dat aint sia demischiun han muossà quant importantas cha las valuors da la PLD sun: Il pol liberal illa Svizra, per plazzas da lavur, per sgürar il sistem social e per üna stadi a favur dal burgais. Quai rinforza la PLD in vista a las tschernas dal 2019. Be cun üna PLD valurusa as poja sgürar quista politica. Quai sarà eir il böt da la PLD.Ils Liberals Grischun illas tschernas dal parlamaint e da la regenza grischuna e tschernas naziunalas dal 2019.
Silvio Zuccolini, chef da pressa
|