Fracziun PLD tratta la revisiun parziala da la ledscha da polizia – polizia unifichada nun es giavüschada
La fracziun PLD suot la bachetta da Vera Stiffler ed in preschentscha dal cusglier guvernativ e directur da la pulizia Christian Rathgeb ha pardert la sessiun d’avuost. Ella ha fat quai in sia cumposiziun nouva l’eivna passada ad Aschera. Il tema principal d’eira la revisiun parziala da la ledscha da polizia, lura eir amo dumandas da la politica da fuormaziun
Passar tuot ils detagls d’eira üna lavur intensiva. Id es gnü constatà cha la ledscha existenta dal 2005 s’haja confermà , correcturas fundamentalas nu fetschan dabsögn. Incumbenzas parlamentaras daspö chi’d es gnü miss in pratcha l’uorden dal process penal svizzer 2007 ed eir las analisas dal rapport da polizia 2015 fetschan però dabsögn d’adattaziuns. Tenor la constituziun chantunala hajan in man chantun e cumüns la sgürezza publica, üna da las incumbenzas fundamentalas dal stadi. Il chantun ha da statuir las cumpetenzas in quist merit. Uschè sun uossa da fixar las incumbenzas chantunalas e quellas cumünalas. Quai nu voul dir cha’ls cumüns hajan uossa daplü incumbenzas. Els survegnan però cumpetenzas nouvas per mantgnair la quietezza, l’uorden e la sgürezza. Implü vöglia üna basa legala per stabilir ils cuosts cha’l chantun po dumandar scha la polizia chantunala surpiglia incumbenzas dals cumüns. Be uschè esa cler cha tuot ils cumüns vegnan trattats da la listessa maniera saja chi han ün contrat cul chantun, saja chi han ün’aigna polizia cumünala saja chi han dabsögn dal chantun per dumandas punctualas. La revisiun parziala s-chaffischa quia relaziuns cleras.
Implü voula üna basa legala per indrizs tecnologics, p.ex. bodycams etc. Eir quistas dumandas sun gnüdas trattadas a fuond. Entrar aint il sen da la cumischiun e da la regenza es gnü decis.
Sper quista tractanda sun gnüts a pled duos temas da la fuormaziun, las duos iniziativas popularas : Scoula buna in Grischun – pled in chapitel pro dumandas importantas da fuormaziun ed scoula buna in Grischun – pled in chapitel pro’ls plans da fuormaziun. La discussiun ha muossà chi regna üna tscherta malcuntaintezza ed impotenza areguard il sistem da la scoula. Quella saja adüna plü chara, ma gnanca zich megldra. Quai saja üna situaziun pac satisfacenta chi stopcha gnir müdada. Ma i nu saja la cumpetenza dal parlamaint da’s masdar aint directamaing e precis quai vöglian las duos iniziativas. Adattamaints e correcturas fetschan dabsögn, e quai urgiaintamaing. Entrar es gnü decis, las duos iniziativas però sbüttadas, eir schi han giodü tschertas simpatias.
Die grösste Fraktion im Grossen Rat stellt sich während der Fraktionssitzung dem Fotografen (Bild Silvio Zuccolini)
