D’incuort ha invidà la PLD ils seniors da la partida, homens e duonnas da la generaziun dals attempats da visitar la chasa SOMEDIA a Cuoira. Respunsabel eir quista jada Rudolf Oertle da Razen.
Silvio Lebrument, member da la direcziun da l’impraisa e Conny Ammann chi maina il secretariat da l’editur ed es respunsabla per PR ed evenimaints han salüdà ils preschaints e dat il bainvgü. In duos gruppas hana visità la chasa, nouva ed impreschiunanta, ed han pudü verer las spartas diversas, televisiun, radio ed il News Room. Las infuormaziuns richas d’üna impraisa da medias, pel solit cuntschainta be dad utrò, han dat ün purtret tuot nouv, infuormativ ed interessant.
La seguonda part dal davomezdi d’eira lura dedichà al star insembel, quai i’l motel Sommerau, ed a las infuormaziuns politicas. Cusglier da stadi Martin Schmid ha rapportà da Berna, cusglier guvernativ Christian Rathgeb dals affars dal chantun e da seis departamaint e Vera Stiffler, presidenta da la fracziun, da las lavuors da quella. Uschè han survgni ils seniors infuormaziuns our da prüm man, ün fat chi vain stimà fich.
Eir l’an chi vain sun previs evenimaints per quist sectur dals commembers da la PLD. Il comitè s’es cunsciaint cha quai es üna incumbenza importanta e nöbla e perquai ha’la seis lö aint ill’agenda da la PLD Grischun eir 2019.
Silvio Zuccolini, chef da pressa