Mità schner han organisà las duos partidas circuitalas PLD Val Schons e Rheinwald üna sairada cun Martin Schmid e Vera Stiffler, grandcusgliera ad Andeer. Preschaint d’eira eir Peter Flütsch , grandcusglier da Splügia. I d’eira il di da la votumaziun sur dal Brexit aint il parlamaint inglais. Quai ha dat andit a Martin Schmid, chi sarà candidat d’utuon pro las tschernas aint il cussagl da stadis, da referir eir reguard la relaziun da la Svizra cun l’uniun europea
Aint ill‘ uschèditta cunvegna da basa sun tenor el amo bleras dumandas brich cleras. La politica sto spiegar ils avantags e dischavantags d’üna tala cunvegna. Hoz nu saja amo cler co cha’l bilantsch as preschainta. Cler saja però cha il güdisch europeic decidess materialmaing in blers puncts e cha il spazi per decisiuns democraticas in Svizra füss diminui. Martin Schmid favurisescha cleramaing da trattar amo üna jada. La cunvegna actuala nu chattess üna majorità il üna votumaziun dal pövel.
Implü ha tematisà Martin Schmid dumandas importantas per la regiun sco la politica agraria, ils fits d’aua e l’egualisaziun da finanzas. Precis illa regiun dal rain posteriur sajan las decisiuns da Berna d’üna importanza decisiva. Martin Schmid ha pudü muossar co ch’el rapreschainta ils interess da la regiun e dal chantun a Berna, el sco cusglier guvernativ anteriur.
Vera Stiffler, grandcusgliera e presidenta da la fracziun ha in seguit referi sur da la lavur dal cussagl grand. Da discuorrer han dat lura temas sco l’iniziativa cunter la chatscha suplementara o il luf. Ils preschaints han pudü constatar cha la PLD cun Vera Stiffler piglian la lavur aint il parlamaint sül seri ed investischan cumpetenza ed experienza a favur da la populaziun.
Silvio Zuccolini, Pressechef
Foto vlnr: Ernst Barandun, Vera Stiffler, Martin Schmid, Peter Flütsch
