Center da sport d’inviern Planüra es e resta ün’incumbenza da la confederaziun
La PLD.Ils Liberals Grischun vezza cun plaschair cha circuls tuot divers as mettan aint adüna darcheu per l’incumbenza da grandcusglier Rudolf Kunz, Cuoira, quella jada chef da la fracziun, chi vaiva postulà da realisar sülla Planüra ün center da sport da naiv. La PLD ha sustgnü quai activamaing. Ella appellescha a tuot ils interessats da far valair aint il parlamaint federal cha quel center vegna realisà e miss in funcziun. La PLD nun inclegia il cussagl federal chi ha sisti il proget cun argumaints debels, impustüt vezzand cha la situaziun finanziala da la confederaziun permettess la realisaziun i’l interess da la giuventüna.
Per la PLD.Ils Liberals Grischun es la realisaziun d’ün tal center ün’incumbenza federala. I vain pretais minchatant cha’l chantun possa entrar illa chosa. Quai nu das-ch’esser. Sco Magglingen e Tenero es quai ün proget federal. Scha’l proget sülla Planüra, malgrà il sustegn interchantunal i’l parlamaint federal, nu vess ingünas schanzas lura as stuvess concentrar il chantun süllas instituziuns existentas i’l chantun e rinforzar quellas, p.ex. ils gimnasis da sport, il center da prestaziun per sport da naiv a Tavo e las scoulas da talent. Finanzas chantunalas sun previssas be per sportivs chi sun domiciliats i’l chantun.
