Radunanza generala dal supporter club PLD aint il museum da la viticultura a Cuoira
L’eivna passada s’ha reuni il supporter club da la PLD.Ils Liberals per sia radunanza annuala cun ün referat, quai aint il torculum a Cuoira
Quist club exista daspö 26 ans e s’ingascha per la PLD.Ils Liberals Grischun inclusiv ils giuvens liberals e quai cun finanzas ed ideas. Actualmaing sta’l suot il presidi da Martin Wieland, Tumein, cusglier grand e president dal parlamaint.
Il president da la partida, cusglier grand Bruno Claus e la cheffa da la fracziun Vera Stiffler, eir ella cusgliera granda, han portà ils salüds da la partida e da la fracziun e rapportà davart las activitats da quella. Las tschernas nun han dat granda rumpatesta, il president Martin Wieland e la vicepresidenta e chaschiera Karin Iseppi sun gnüts confirmats cun aplaus. Nouv commember da la suprastanza dvainta Markus Berweger, cusglier grand da San Murezzan. Per il revisur Linus Berweger, barmör, aintra Christof Kuoni da Maiavilla. Davo las fatschendas statutaricas ha dat Martin Bühler, chef da l’uffizi per militar e protecziun civila ed eir chef dal stab directiv chantunal üna survista fascinanta da sias activitats e sfidas, tanter oter cur chi va per cumbatter catastrofas.
La fin da la sairada es statta üna tschaina cumünaivla, natüralmaing respectand las masüras da protecziun.
