Ils puncts plü importants dal sböz sun ils seguaints:
Per abitaziuns ingio cha’l possessur sta svess ed ha domicil as voul strichar la valur e quai pro la confederaziun sco pro’ls chantuns. A listess mumaint as voul strichar las reducziuns per mantegnimaint e per renovaziuns, per premias da sgüranzas e per ils cuosts scha ün terz administrescha. Ils chantuns pon mantgnair las reducziuns per la protecziun da monumaints e per spargnar energia.
Tenor la cumischiun nu pertocca quai las seguondas abitaziuns Là resta la valur e l’imposta lasura. Precis listess esa pro abitaziuns chi vegnan dattas a fit. E là restessan natüralmaing eir las reducziuns actualas sco nomnadas sura. Da müdar il sistem eir pro seguondas abitaziuns vess consequenzas massivas pro las impostas dals chantuns da muntagna. In quai chi reguarda la reducziun pervi da fits d’ipotecas preschainta la cumischiun plüssas variantas. Tenor la PLD Grischun as stuvess mantgnair il sistem actual da reducziun per fits d’ipotecas pro abitaziuns secundarias ouramai chi resta là eir la valur da l’abitaziun per calcular l’imposta.
Il sistem sto gnir realisà in tala maniera, tenor la PLD Grischun, chi cunvain da pajar inavo l’ipoteca inschinà es quel il furber chi ha debits grands.
Saja sco chi vöglia, la PLD.Ils Liberals Grischun s’allegra fich ed es persvasa chi’s voul levar l’imposta sülla valur da l’aigna abitaziun chi dal rest nu s-chaffischa güstia visavi quels chi piglian a fit lur abitaziun sco cha quai vain pretais adüna darcheu. Alch chi vess stuvü capitar fingià dalöntsch innan.
Silvio Zuccolini, chef da pressa