Cun plaschair vezza la PLD Grischun ils sforzs repetits areguard l’idea d’üna Porta Alpina. La PLD Grischun d’eira persvas da prüm davent cha la Porta Alpina, ün proget visiunari, füss ün‘opportunità unica per la Surselva e per tuot il chantun Grischun, quai our da vista turistica ed economica. Sco chi para han fat impreschiun la decisiun negativa dal cussagl federal (fingià üna jada in mai 2007), ma eir la critica massiva e propaganda negativa da las medias da la Bassa. La pressiun sül cussagl federal, ma eir sülla regenza grischuna d’eira plü granda co la decisiun dal pövel grischun. La PLD.Ils Liberals less trar adimmaint quella decisiun cun tantüna 70% da Schi a la Porta Alpina. Dal sgür ha eir gnü effet la refüsa massiva da la direcziun da las viafiers federalas.
Il suspet s’ha verifichà, la regenza grischuna ha dat per pers il cumbat per la Porta Alpina, impustüt per motivs finanzials, quella jada in mai 2007. Quai es gnü incunter al cussagl federal. Quai però nun ha merità la populaziun da la Surselva, impustüt brich la giuventüna. Cun la discussiun actuala e cun ils sforzs da la politica grischuna as sainta uossa ün vent nouv. Quai fa plaschair. La Porta Alpina chatta uossa sustegn, e quel nun es pitschen. La PLD.Ils Liberals Grischun sustegna inavant quist proget innovativ.
Uossa esa üna sfida per la regenza grischuna. Dad ella vain pretais da far tuot per cha’l proget chatta sustegn eir sül livè naziunal.
Silvio Zuccolini, chef da pressa PLD,Ils Liberals Grischun
