La PLD.Ils Liberals Grischun sustegna las masüras cha’l chantun e la confederaziun han tut per cumbatter il virus Corona. Il böt principal sto esser quel da minimisar ils dans socials ed economics per la populaziun. Daplü co 90 % da las plazzas da lavur as chatta pro impraisas pitschnas e mezdanas. Perquai as stoja verer in prüma lingia per quellas impraisas e per ils independents.
La populaziun ha eir üna respunsabiltà per sai svess, i nun es be il stadi chi porta respunsabiltà. Ils raps d’imposta chi vegnan uossa investits, ston gnir investits bain miradamaing ed intelligiaintamaing.
As basand sün quists fats as spetta da la regenza grischuna üna strategia exit clera e bain inclegiantaivla per sortir dal lock down actual. In quist connex pretenda la PLD.Ils Liberals Grischun :
1. Scoulas publicas ston gnir avertas il plü svelt pussibel, eventualmaing tenor il ris-ch, e ston riprender l’agir solit. Davo las vacanzas da prümavaira ston lavurar darcheu las scoulas popularas e las scoulas superiuras sco avant la crisa.
2. Per las butias ed impraisas pitschnas sco eir per ils independents as sto preverer il plü svelt pussibel da tils far lavurar darcheu, as tgnand vi da las directivas da l’uffizi federal da sanità.
3. Implü pretenda la PLD Grischun cha’ls plazzals da fabrica restan averts . I dà buns exaimpels chi’d es pussibel da lavurar as tgnand vi da las masüras dal cussagl federal.
Eir operaziuns giavüschadas sco eir consultaziuns medicalas, fisioterapias e sportas da fitness sco eir spüertas i’ls restorants (cun la distanza necessaria) stuvessan esser pussiblas, analog a las butias ed apotecas ingio cha quai es pussibel fingià uossa
Davo ils 19 avrigl esa da renunzchar sün radunanzas sco radunanzas generalas e.u.i., ma la vita stuvess darcheu gnir normalisada tant inavant chi’d es pussibel.
Implü douvra daplü tests da corona per evitar chi detta üna seguonda uonda .
Per finir suottastricha la PLD.Ils Liberals Grischun ch’ella sustegna la posiziun da la confederaziun da brich serrar ils cunfins cumpletamaing. Ils frontalieris sun d’importanza existenziala perlas impraisas i’ls chantuns Tessin e Grischun.
La regenza dal chantun Grischun es clamada da nüzziar tant co pussibel seis spazi d’agir i’l sen da quistas pretaisas e da star aint per quellas a Berna activamaing.
Silvio Zuccolini, chef da pressa
PLD.Ils Liberals Grischun
