Fracziun PLD.Ils Liberals a Cuoira –trattà program da la regenza e plan finanzial 2021 – 24: PLD voul respectar las normas finanzialas

von links: Regierungspräsident Christian Rathgeb, Fraktionschefin Vera Stiffler, Standes-Vizepräsident Martin Wieland

Lündeschdi passà ha pardert la fracziun PLD.Ils Liberals dal cussagl grand la sessiun da favrer. Ella ha fat quai a Cuoira suot la guida da la preseidenta Vera Stiffler ed in preschentscha dal president da la regenza, directur da las finanzas, Christian rathgeb e dal vicepresident dal cussagl Martin Wieland.

Ils seguaints puncts sun gnüts trattats:
In prüma lingia il program da la regenza ed il plan finanzial 2021 – 2024. Id es gnü constatà cha’l program da la regenza es chosa exclusiva da la regenza. La fracziun possa bainschi til trattar e far valair giavüschs da müdamaint, ma a la fin be tour cugnuschentscha. Daplü nu possa dir la fracziun a quist catalog d’ideas da la regenza. Natüralmaing haja dat ideas diversas in quista chosa e la fracziun PLD ha discus plüssas uras, suot la guida dal president da la cumischiun Bruno W. Claus. Il president da la regenza preschaint ha stuvü trar adimmaint plüssas jadas al fat manzunà al cumanzamaint.

Quai d’eira oter pro’l plan finanzial. Quia ha tut posiziun la fracziun cun radschun. Il directur da las finanzas Christian Rathgeb ha suottastrichà chi nu saja ruot oura il bainstar e chi nu's possa finanziar mincha giavüsch manzunà. I saja fich important da tgnair aint las normas finanzialas. Da decider expensas chi’s repetan lura an per an nu’s possa far, quai d’eira l’appell dal directur da las finanzas. La situaziun finanziala dal chantun nu restarà uschè buna sco uossa, vis las entradas chi’s diminuiran e las spaisas chi s’augmentaran. La fracziun da la PLD voul tour sül seri sia respunsabiltà e tgnair aint scha be pussibel las normas finanzialas. Davo discussiun manüda ha decis p.ex. la fracziun da strichar il punct directiv n. 9 (spazis d’acziun) sco propuonü da la cumischiun.

La fracziun ha lura cumanzà da trattar la revisiun parziala da la ledscha d’energia. Ant co ir aint ils detagls es gnü critichà – sco fingià i’l proceder da consultaziun – cha üna jada daplü manca l’ordinanza necessaria. Üna pretaisa chi stuvess esser realisada fingià dalönch innan. L’inizi da la discussiun in detagl ha lura muossà chi darà amo bler da trattar e cha las ideas van amo ourdaglioter. I vain cuntinuà cun quist sböz illa sezzüda chi vain

Silvio Zuccolini, chef da pressa
PLD.Ils Liberals Grischun