Scharans, 17. Mai 2012

Medienmitteilungen

PLD Grischun. Ils Liberals: radunanza generala a Maiavilla

La PLD.Ils Liberals Grischun as radunarà in giövgia als 24 mai 2012 a Maiavilla. La radunanza generala varà da trattar las fatschendas tenor ils statuts, uschè p.ex. il rapport dal president da la partida Michael Pfäffli e dal chef da la fracziun Reto Nick. Lura saran da tscherner il comitè da la PLD e’ls ulteriurs organs. Implü as pigliarà incunter il rendaquint dal 2011.

Davo la radunanza generala saran da decider las parolas per duos propostas federalas: La seguonda iniziativa spargnar per fabrichar e la ledscha federala reg. la sgüranza d’amalats (managed care).

La radunanza generala varà lö aint il Swiss Heidi Hotel a Maiavilla, cumanzarà als 18.30 cun ün aperitiv, la radunanza svessa a las 19.00h. Ella es avierta sco adüna per tuot ils commembers da la PLD.

Scharans, 7. Mai 2012

Medienmitteilung

PLD cumbatta l’imnatscha d’expropriaziun per proprietaris da chasa indigens

Il comtè da la PLD.Ils Liberals Grischun s’ha occupà darcheu üna jada cun l’iniziativa reg, seguondas abitaziuns chi malavita es gnüda acceptada. Our da la vista da la PLD as stoja evitar cha’ls possessurs da chasa indigens vegnan a la cuorta. L’inizativa es gnüda acceptada d’üna magioranza chi nun es pertoccada. Ma la minorità aint illas regiuns da muntagna s’ha exprimida cunter ed ella es fermamaing pertoccada.

La PLD Grischun pretenda cha la facultà da la populaziun grischuna vegna protetta. I va per las immobiglias fingià existentas. La proprietà es protetta già aint illa constituziun. I nu va cha immobiglias chi hoz sun abitadas d’indigens ün di nu possan plü gnir vendüdas libramaing e sainza servituts reguard l’adöver. I nu va neir cha’ls proprietaris actuals da la seguondas abitaziuns guadagnan cun quist’iniziativa ed ils indigens perdan. Perquai sun d’excluder las immobiglias existentas da l’iniziativa. Per augmentar la sgürezza giuridica supplicha la PLD.Ils Liberals Grischun a la regenza d’atschertar sco ils chantuns Friburga, Berna e Vallais chi’s possa dar permiss da fabrica per seguondas abitaziuns fin als 31 december 2012, üna posiziun chi vain sustgnüda da divers professurs renomnats. La PLD nun es dafatta brich perincletta culs dits da cusgliera federala Doris Leuthard la saira da la votumaziun chi nu muossan ingün’incletta per la populaziun muntagnarda e per la protecziun dal possess. La PLD farà tuot per evitar cha’ls possessurs da chasa indigens vegnan quasi exproprietats e cha lur facultà vegna ridotta considerabelmaing. Cusglier da stadis Martin Schmid s’ha fingià miss aint a Berna per quista fatschenda.

Scharans, 7. Mai 2012
Medienmitteilung

Club dals 60+ da la PLD.Ils Liberals: Visita da las ouvras electricas da Reichenau a Domat

Il prossem inscunter tradiziunal dals seniors da la PLD.Ils Liberals Grischun (60+) varà lö lündeschdi, als 14 da mai 2012 a las 14.00h pro las ouvras electricas Reichenau a Domat.

Lö d’inscunter a las 13.45 es la centrala a Domat.

Davo la visita es previs l’inscunter persunal aint il restorant Tircal a Domat. Là sarà lö sco üsità per las infuormaziuns da la politica federala e chantunala . Preschaints saran il cusglier guvernativ nouvelet Christian Rathgeb, chef dal departamaint güstizia, pulizia e sanità, il president chantunal Michael Pfäffli e’l chef da la fracziun Reto Nick.

Il program detaglià cun il talon d’annunzcha es gnü tramiss fingià avant ün temp als commembers dal club 60+ da la PLD.Ils Liberals Grischun tras il parsura Ruedi Oertle, Razen.

Invidats sun eir tuot ils commembers da la PLD chi han cumpli ils sessanta e chi nun han artschvü ün invid persunal. Il comitè da la PLD.Ils Liberals Grischun s’allegra dal fat cha quists inscunters tradiziunals ed adüna interessants sun adüna fich bainvis pro’ls partecipants numerus.

Scharans, 28. April 2012
Medienmitteilung

PLD disch Schi al referendum reguard la ledscha chantunala da la taxa da turissem LTT e pretenda cha la proprietà dals indigens vegna protetta cur chi’s tratta da metter in ouvra l’iniziativa da las seguondas abitaziuns

Il comitè da la PLD.Ils Liberals Grischun s’ha reuni d’incuort a Reichenau, aint il hotel Adler.

Üna jada daplü s’haja discus la ledscha chntunala da la taxa da turissem LTT fattta buna dal grandcussagl illa sessiun d’avrigl. Davo cha la fracziun PLD ha vuschà circa unanimamaing cunter la ledscha es il referendum la consequenza logica. Ün comitè independent, miss insembel da differents circuls, organisarà quist referendum. La PLD as parteciparà.

Cumbatter l’expropriaziun dals possessurs da chasa indigens

Ün grand tema d’eira eir co chi’s voul metter in ouvra l’iniziativa da las seguondas abitaziuns, fatta buna dal pövel als 11 marz 2012. La PLD Grischun as mettarà aint cun tuot sias forzas cha’l possess dals indigens in nos chantun vegna respectà. La PLD Grischun cumbattarà tuot las propostas chi van cunter quista protecziun e quai cun tuot ils mezs politics

Silvio Zuccolini 25 ans chef da pressa PLD

Davo la sezzüda dal comitè s’haja festagià aint il üert da l’hotel ils 25 ans Silvio Zuccolini, chef da pressa PLD Grischun. Silvio Zuccolini ha pudü tour incunter l’ingrazchamaint e la gratulaziun dal comitè e da la partida per sia lavur cumöna a favur da la partida. Il president da la partida, Michael Pfäffli, il vicepresident Urs Marti e’l cusglier da stadi Martin Schmid han onurà a Silvio Zuccolini chi d’eira visiblamaing commoss da quist’onurificaziun.

Scharans, 21. April 2012
Medienmitteilung

Gratulaziun cordiala al president nouv da la PLD svizra, cusglier naziunal Philipp Müller

La PLD.Ils Liberals Grischun gratulescha cordialmaing al president nouv da la PLD, cusglier naziunal Philipp Müller per sia tscherna onurifica e splendida a Berna

.

La PLD Grischun s’allegra da la tscherna unanima. Ella es pronta per üna cooperaziun constructiva ed amicala cul president nouv.

La PLD.Ils Liberals Grischun sperescha cha la tscherna da Philipp Müller sarà per la PLD ün simbol per il plaschair vi da la politica. Cun fiduzcha as parteciparà la PLD Grischun vi da las lavuors futuras da la partida svizra, eir in quai chi reguarda ils müdamaints persunals in funcziuns importantas.

No giavüschain a Philipp Müller bler success, fiduzcha, forza e satisfacziun in seis uffizi nouv sco president da la PLD.Ils Liberals svizra.

Al president chi’s retira, cusglier naziunal Fulvio Pelli ingrazcha la PLD.Ils Liberals Grischun per sia lavur e si’actività pel bön dal liberalissem svizzer. Ils ultims ans nu d’eiran per la partida svizra ans da success, oter co pro la partida chantunala. La PLD Grischun sperescha cha quai as müda uossa eir sül livè svizzer e cha la tscherna dal president nouv saja il prüm pass vers quai.

Scharans, 8. April 2012

Medienmitteilung

PLD fracziun a Flem Waldhaus: Ledscha da la taxa turistica LTT: Entrar cun divers dubis e pretaisas

Marcurdi, als 4 d’avrigl ha pardert la fracziun PLD.Ils Liberals Grischun la sessiun d’avrigl dal grandcussagl. Suot il presidi da Reto Nick, Igis, chef da la fracziun, ed in preschentscha dal cusglier guvernativ Christian Rathgeb s’ha datta giò la fracziun impüstüt culla nouva ledscha da la taxa turistica. Il sböz ha provochà üna discussiun ingaschada e cuntroversa.

Il prüm punct d’eira la fusiun da Tschlin e Ramosch, la fracziun salüda quella.

Davo s’es i vi da la ledscha da la taxa turistica LTT. La discussiun nun ha zoppantà cha la fracziun PLD ha grands dubis reguard quista ledscha. Ella es però pronta eir inavant da collavurar in möd constructiv per chattar üna maniera da finanziar il turissem.Uschè s’haja decis d’entrar, ma quist entrar es lià vi da duos pretaisas cleras. La prüma es cha cumüns chi han fingià ün contrat da prestaziun e da finanziaziun cun üna destinaziun turistica nu manglan müdar al sistem nouv. La seguonda es cha’ls cumüns cun taxas variablas p.ex. per abitaziuns da seguonda proprietà, commerzi e.u.i.pon dozar, resp sbassar las taxas in möd substanzial. Quai fa dabsögn per brich chargiar ils hotels da massa e per gnir incunter als bsögns individuals da las regiuns. Scha quistas duos pretaisas nun vegnan accumplidas tuottas duos nu po acceptar la fracziun PLD la ledscha nouva.

Scharans, 30. März 2012

Medienmitteilung

PLD Grischun sustegna a Philipp Müller sco president nouv da la PLD

Sci chi’s sa es Philipp Müller , cusglier naziunal da l’Argovia, intant l’unic candidat per il presidi da la PLD Svizra. Sco leader da la cumischiun d’economia dal cussagl naziunal es Philipp Müller ün dals eminents politikers d’economia. El ha collavurà illa prüma fila pro la proposta „too big to fail“ e s’ha miss aint ferm per üna plazza da finanzas chi po concuorrer e chi’d es confuorma cullas prescripziuns areguard impostas. Implü ha el buollà la politica dals esters dals ultims ans. El cumbatta tant per ils contrats bilaterals ed il liber passagi da las persunas sco eir per tour a man ils problems acuts cull’immigraziun. El es cusglier naziunal daspö 2003.

La PLD Grischun es persvasa chi’s elegia cun Philipp Müller üna persunalità chi’d es in bun contact culla basa da la partida . Ch’ el ha dit da prüm davent in maniera fich transparenta ch’el haja interess per quista funcziun, es üna trat fich simpatic.

La PLD.Ils Liberals Grischun til less dar sün via sia persvasiun cha la politica es alch chi fa plaschair. Cun quist slogan voul signalisar la PLD Grischun seis sustegn e sia vöglia da collavurar cul president nouv chi gnarà elet als 21 avrigl 2012 a Berna illa radunanza da delegats.

Scharans, 23. März 2012

Medienmitteilung

PLD: Novità positiva da Berna – finanzas per il tunnel d’Alvra sun previssas

D’incuort ha decis il cussagl federal da metter a disposiziun 220 milliuns per ün tunnel nouv tras l’Alvra. La PLD s’allegra fich da quista decisiun, uschè es uossa garanti cha ‘ls raps per quist’ouvra chi fa nair dabsögn per il chantun sun avant man. Il chantun svess ha fingià miss d’vart 40 milliuns per quista fatschenda

La PLD.Ils Liberals spetta cha’l parlamaint federal chi ha amo da tour posiziun vezza eir el cha il tunnel sto gnir sanà, resp. fabrichà nouv e chi’s possa uossa ir vi da la planisaziun cun granda priorità. Previs esa da cumanzar 2014 culla fabrica scha tuot va sco giavüschà.

La PLD Grischun es fich satisfat da quista decisiun dal cussagl federal chi sta in cuntrast cun la discussiun actuala reguard metter in pratcha l’iniziativa da las seguondas abitaziuns ingio cha tuot es amo dubius.

Scharans, 16. März 2012

Medienmitteilung

PLD salüda la task force da la regenza in connex cun metter in pratcha l’iniziativa seguondas abitaziuns

Sco chi’d es gnü cuntschaint ha decis la regenza grischuna d’installar üna task force chi ha l’incumbenza da sclerir las bleras dumandas ed intschertezzas areguard l’iniziativa da las seguondas abitaziuns chi’d es gnüda fatta buna dal pövel.

La PLD.Ils Liberals Grischun salüda quist proceder vivamaing perche quia esa da far alch. Quai ha constatà eir la conferenza da las regenzas i’l arch alpin ed installà eir ella üna tala task force. Böt da tuot quistas lavuors esa da s-chaffir il plü svelt pussibel sgürezza d’investiziuns e da planisaziuns per tuot quels chi han dabsögn da quella . Eir las consequenzas giuridicas ed economicas, la perdita eventuala da plazzas da lavur e l’emigraziun chi and pudess resultar ston esser ün tema. Implü eir il chalar dal smerdsch per las impraisas da fabrica da tuot gener.

La PLD.Ils Liberals Grischun sustegna la regenza scha quella pretenda cha l’artichel constitutiv sto gnir miss in pratcha in maniera pragmatica insembel culs oters chantuns da muntagna. La PLD spordscha seis agüd in quista direcziun.

Scharans, 13. März 2012

Medienmitteilung

PLD.Ils Liberals Grischun:

Ledscha per la taxa da turissem es fich cuntraversa

Venderdi, als 9 da marz ha gnü lö üna da las dietas tematicas da la PLD.Ils Liberals Grischun, quista jada illa regiun turistica da Tavo. La sairada staiva suot il titul : Ledscha per la taxa da turissem in Grischun LTT. Daspö ses ans refuormescha il turissem grischun sias structuras ed incumbenzas per savair concuorrer plü bain. Davo quist process da transfuormaziun as voul uossa rimplazzar las taxas da cura ed oters instrumaints cumünals tras ün sistem da finanziaziun actual e valabel per tuot il chantun. La regenza ha fat bun la missiva a man dal grandcussagl per sia sessiun d’avrigl. La LTT d’eira fich cuntraversa pro’ls referents ed eir pro’l public.

Hans Peter Michel, mastral da Tavo chi ha manà tras la dieta ha suottastrichà in si’introducziun cha la medaglia LTT haja duos varts. I detta regiuns turisticas chi cugnuoschan fingià üna taxa da promoziun turistica e chi nun hajan dabsögn da chosas nouvas. Chi sajan plütost las regiuns pitschnas chi spettan sün üna ledscha chantunala e chi sajan dependentas da quella.

La skepsis da la PLD resta

Reto Nick, president da la fracziun PLD, Igis, ha spiegà l’istorgia da la proposiziun actuala, istorgia chi cumainza fingià 2006. El ha preschantà implü il mecanissem davo la proposta. La fracziun PLD nun haja amo tut posiziun in detagl, ma la skepsis existenta daspö il cumanzamaint nu saja amo svanida.

Reto Branschi,CEO/directur da Davos-Klosters turissem nun ha zoppà cha sia organisaziun nun haja ingün plaschair vi da la ledscha nouva, Cha quella porta var 6 milliuns damain e quai vess la consequenza chi’s stuvess redüer prestaziuns turisticas In seis facit ha dit Branschi cha las 4 regiuns fermas dal turissem grischun sajan respunsablas per 64% da las nottadas, e cha 13 regiuns sajan lura quellas chi profitan da las quatter fermas.

L’hotelier Jürg Zürcher da Tavo ha preschantà la posiziun da hotel gastro Tavo. Quist’organisaziun es cleramaing cunter la ledscha. Ella voul ragiundschar illa discussiun politica cha la DMO Tavo-Clostra possa tscherner sch’ella vöglia mantgnair il sistem actual eir scha la ledscha nouva vegna introdütta.

Destinaziuns plü pitschnas han dabsögn da la LTT

El d’eira ün pa sulet, Stephan B. Kaufmann, manader da Viamala Turissem. Ma tant daplü s’ha el miss aint per la LTT. Sia regiun haja dabsögn da la ledscha nouva perche sainza mezs finanzials suplementaris nu’s riva da far quai chi’s vess da far sül champ turistic. Il böt da la ledscha nu saja da favorisar las regiuns periferas. La ledscha saja üna soluziun güsta chi vöglia cha tuots quels chi profitan, pajan eir, quai chi nu saja il cas actualmaing. La LTT s-chaffischa üna basa unitaria, rinforza las structuras drizzadas oura sül marchà, güda al sistem e detta sgürezza per planisar.

Per finir es gnü a pled la regiun Engiadin’Ota illa persuna da Martin Merz, president da la società da mansteranza e commerzi, Samedan/Bever. Sco chi d’eira da spettar ha el cumbattü veementamaing la ledscha. Cha quella serva be per scumpartir raps dad ün lö a l’oter e quai cun ün mecanissem cumplichà e char chi saja da cumbatter. El propuona ün finanziamaint da start per quellas regiuns chi nun han amo nöglia. Las otras stopchan avair la pussibiltà da restar pro lur maniera. La LTT nu fetscha ün meglder turissem, ma la bürocrazia augmainta. Sias propostas sun tschient per tschient sülla lingia da la PLD.

Illa discussiun davo ils referats s’han fats dudir divers commembers dal grandcussagl chi nu han pudü incleger co chi’s possa esser cunter quista ledscha. Cha quella tantüna megldrescha las relaziuns cul turissem e chi fetscha nair dabsögn d’ün sistem nouv da finanziaziun.

Scharans, 12. März 2012

Medienmitteilung

La PLD Grischun s’allegra dal Na als predschs fixs per cudeschs. Il Na radschunaivel a l’iniziativa per daplü vacanzas sgürescha plazzas da lavur

Il Na cler dals votants e da las votantas svizzers a l’iniziativa „6 eivnas vacanzas per tuots“ es üna decisiun importanta e radschunaivla per plazzas da lavur sgüras in Svizra. Il Na mantegna la capacità da concuorrer da la Svizra sco lö d’economia e permetta soluziuns partenarias flexiblas. Impustüt per las impraisas pitschnas e mezdanas, importantischmas in Grischun, es quist resultat ün grand surleivg.

La PLD.Ils Liberals Grischun es fich satisfatta dal Na da la populaziun als predschs fixs per cudeschs. Ils votants svizzers s’han decis cunter ün dictat na-liberal. Cun quist dictat vessi dat be da quels chi perdan, in prüma lingia ils consuments e las consumentas. Els vessan gnü da pajar predschs massa ots. Uossan restan ils cudeschs bunmarchats. Las librarias pitschnas e’ls auturs svizzers pon uossa cumpetter cun ün service innovativ e buns cudeschs cunter ils müdamaints da las structuras invezza da durmir in üna sgürezza chi ingiona.

Stop da fabrichar, perdita da plazzas da lavur, dan per il turissem e violaziun da l’autonomia cumünala. Quai sun las consequenzas previsiblas dal Schi be güsta a l’iniziativa da seguondas abitaziuns. Il limit rigid da seguondas abitaziuns sün 20 % in tuot ils cumüns indeblischa ils cumüns e’ls chantuns e s-chaffischa inegualitats regiunalas nouvas. Metter in pratcha l’iniziativa nu sarà simpel e stuvarà gnir fat cun precauziun. Almain as poja cunstatar cha la populaziun dal Grischun ha vuschà cleramaing cunter l’iniziativa e quai cun 57.34 %.

Il Schi a la proposta Sinergia, ün Schi be güsta, voul dir chi’s centralisarà a Cuoira sco fingià illas regiuns, l’administraziun chantunala. Quai stuvess portar cun sai daplüssa effizienza e stuvess manar l’administraziun plü dastrusch a la populaziun.

La PLD.Ils Liberals Grischun suottastricha cun granda satisfacziun cha la populaziun grischuna ha vuschà quista fin d’eivna precis sco chi d’eira propuonü da la partida.

Scharans, 8. März 2012

Medienmitteilung

Ledscha per suplemaints da famiglia: Tscherts dubis restan

La ledscha chantunala dals suplemaints da famiglia sto gnir adattada al dret federal..La PLD.Ils Liberals Grischun ha tut posiziun ed inseri in sia posiziun tscherts puncts critics. Nouv esa cha’ls independents dadour l’agricultura ston uossa obligatoricamaing as suottametter a la ledscha. La PLD.Ils Liberals Grischun nun es fich favuraivla areguard il sböz preschantà.

Quel prevezza cha’ls patruns svess han da finanziar sco fin uossa las cuntribuziuns per ils lavuraints. Quels nu contribuischan svess nöglia. Al cuntrari da quai, e quai es ün punct critic, han da portar ils independents tuot lur cuntribuziun

Implü critichescha la PLD.Ils Liberals cha ün surleivg moderà per independents cun pac’entrada nun es previs. Üna tala reglamentaziun es previssa aint illa ledscha da la SVR, contestada dad ingün. La PLD.Ils Liberals intimescha al chantun d’examinar üna tala soluziun eir quia. Uschè vain evitada üna chargia suplementara per independents cun ün’entrada pitschna.

Positiv chatta la PLD.Ils Liberals Grischun cha las contribuziuns sun limitadas, maximalmaing sül guadagn sco illa sgüranza d’accidaints obligatoria.

Scharans, 29. Februar 2012
Medienmitteilung

PLD fracziun a Tavo – ledscha da scoula aint il center

Venderdi, als 9 da marz parderdscherà la fracziun PLD.Ils Liberals dal grandcussagl la sessiun straordinaria da marz 2012. Suot il presidi da Reto Nick, Igis, sarà la ledscha da scoula aint il center da las trattattivas, quai aint il hotel Grischa a Tavo.

Ouramai chi saran da trattar aint il cussagl amo daplü co 70 artichels sarà dedichà quist di unicamaing a la ledscha da scoula.

La sezzüda da la fracziun cumainzarà venderdi, als 9 da marz a las 13.45 aint il hotel Grischa a Tavo. Ella giarà fin a la dieta publica al listess lö. Quella trattarà la ledscha da la taxa da turissem e cumainza a las 18.30.

Scharans, 29. Februar 2012
Medienmitteilung

PLD.Ils Liberals Grischun:

Dieta publica reguard la ledscha nouva ‘taxa da turissem’

Venderdi, als 9 da marz varà lö üna da las dietas tradiziunalas publicas da la PLD.Ils Liberals Grischun, quista jada illa regiun turistica da Tavo. Quista dieta es suot il titul La ledscha nouva ‚taxa da turissem‘ dal chantun Grischun. Daspö ses ans es il turissem grischun landervia da refuormar sias incumbenzas e sias structuras per far frunt a la concurrenza. Davo quist process da transfuormaziun stuvessan gnir rimplazzadas uossa las taxas da cura e las taxas da promoziun da turissem cumünalas tras ün sistem da finanziaziun plü modern e cumpigliand tuot il chantun. La regenza ha fat bun sia missiva a man dal grandcussagl, quai per la sessiun d’avuost.

Divers experts referischan our da differents puncts da vista. I sun quai:

• Vorgeschichte TFA und TAG / Der Tourismus der Hauptmotor der Wirtschaft
  Reto Nick, FDP-Fraktionspräsident, Igis
• Auffassung der Tourismus-Destination Davos Klosters
  Reto Branschi, Direktor/CEO Davos Destinations-Organisation (DDO)
• Das TAG aus der Sicht der Hotellerie
  Jürg Zürcher, Präsident Hotel-Gastro Davos (HGD)
• Ansicht einer kleinen Tourismusdestination
  Stephan B. Kaufmann, Geschäftsführer Viamala Tourismus
• Die Beurteilung aus Sicht des Gewerbes
  Martin Merz, Präsident Handels- und Gewerbeverein Samedan/Bever

La dieta PLD es publica. Ella ha lö venderdi, als 9 da marz 2012, 18.30 aint il hotel grischa, Talstrasse 3, Tavo Platz. L’arrandschamaint cumainza cun ün aperitiv e lura a las 19.00 cun la dieta svess.

Scharans, 22. Februar 2012
Medienmitteilung


L’iniziativa da seguondas abitaziuns fa perder il chantun Grischun.

Scha l’iniziativa passa als 11 da marz 2012 vess quai consequenzas greivas per il chantun Grischun, impustüt per il turissem. Cun quist’iniziativa less gnir restret la quota da seguondas abitaziuns sün 20 perschient in mincha cumün.

La problematica da la construcziun schmasürada da seguondas abitaziuns es cugnuoschüda e masüras per tilla reglar sun tuttas a man. Cumüns chi nu piglian ingünas masüras nu das-chan dar plü ingüns permiss a partir dal 2014

Effets contraproductivs
L’iniziativa pretenda da fixar la quota maximala da seguondas abitaziuns sün 20% per cumün. Ingio cha la pertschentuala es fingià plü ota nun es plü pussibel da fabrichar. Ma oters cumüns pudessan far inavant, voul dir cha la fabricaziun capitess simplamaing in oters cumüns.

Plazzas da lavur periclitadas
Tras quai cha las persunas spendan e tras la fabricaziun d’abitaziuns daja plazzas da lavur preziusas. Circa 10% dal prodot economic in Grischun stan in connex cun seguondas abitaziuns. La populaziun vess da patir fermamaing sainza quistas plazzas da lavur.

La Svizra sco lö dal turissem perdess
La spüerta da seguondas abitaziuns gess fermamaing inavo, la glieud gess in oters pajais sco l’Austria. Il turissem perdess sensiblamaing.

Differenzas localas
Nöglia be ils chalets aint ils lös turistics, ma eir las abitaziuns da students o lavuraints dürant l’eivna in citats valan sco seguondas abitaziuns. I nu’s po schoglier tuot da la listessa maniera. La cuntraproposta indirecta già in vigur prevezza soluziuns. L’iniziativa invezza prevezza contingents fich rigids.

Cunter intervenziuns ill’autonomia chantunala e cumünala
La construcziun da seguondas abitaziuns es ün problem da la planisaziun dal territori. Tenor constituziun federala han ils chantuns e’ls cumüns la cumpetenza da coordinar lur planisaziuns. Chantuns e cumüns han fingià tut masüras e sun landervia da chattar soluziuns. Quista respunsabiltà vain schnejada da l’iniziativa populara.

Scharans, 20. Februar 2012
Medienmitteilung

Votaziun dals 11 marz 2012 – reintroducziun  dals predschs fixs per cudeschs Cudeschs bunmarchats promouvan la lectüra – Na als predschs fixs per cudeschs

Che voul realisar il referndum?

Il referendum as metta cunter la reintroducziun dals predschs fixs per cudeschs. Quella es gnüda acceptada dal parlamaint cun üna pitschna majorità e cunter la vöglia dal cussagl federal. Ils giuvens liberals sun ils promotuors dal referendum.

Il text da la ledscha

La ledscha pretenda cha’ls edituors fixeschan ils predschs. I’s po dar ün rabat, ma be fin 5%. La ledscha cumpiglia eir il marchà online, ma brich ils e-books

Posiziuns ed argumaints

Il parlamaint s’ha decis per la ledscha cun 96 cunter 86 vuschs, damaja ter knapp. La PLD.Ils Liberals d’eira l’unica partida chi ha vuschà cunter cun tuot las vuschs. Las otras partidas d’eiran per, eir singuls da la PPS.

Argumaints

La PLD.Ils Liberals es da l’idea cha predschs fixs per cudeschs nun es üna promoziun da la cultura. Id es eir cunter l’idea dal marchà. I maina a la situaziun cha la ledscha decida sur il guadagn e quai sün cuost dal consument. Il parlamaint voul in fuond introdüer ün cartell scumandà cun l’agüd da la ledscha.

Cudeschs bunmarchats sun la megldra promoziun da la lectüra. Daplü co 90% dals cudeschs vegnan importats e daplü co la mità dal marchà svizzer da cudeschs es in man da chasas edituras da l’ester. Cun predschs plü ots as promouva be cha’ls svizzer van sur cunfin per cumprar aint

La ledscha cumpiglia eir il marchà online. Quai es absurd e nu po gnir controllà in ingüna maniera. Las impraisas svizras stuvaran as tgnair landervia, quellas d’utrò faran che chi vöglian. Cudeschs electronics sun exclus, quels chi guadagnan saran

Amazon, Apple o Google.

Predschs fixs per cudeschs es cunter il sistem, il marchà liber vain sbandi, ün cas da precedenza chi’d es da sbüttar

Damaja : Na a la reintroducziun dals predschs fixs per cudeschs

Scharans, 5. Februar 2012

Medienmitteilung

PLD fracziun sustegna il program da la regenza e la planisaziun finanziala 2013-2016

La fracziun PLD.Ils Liberals ha pardert lündeschdi passà a Cuvglinas la sessiun da favrer dal grandcussagl. Reto Nick, il president da la fracziun manaiva tras las tractandas, preschaint d’eira eir il cusglier guvernativ nouvelet Christian Rathgeb.

I’l center da las discussiuns staiva il program da la regenza e la planisaziun finanziala 2013 – 2016. Implü es gnü discutà la revisiun parziala da la cunstituziun chantunala e da la ledscha dals cumüns. I va per la problematica scha’ls cumüns da vaschins stopchan gnir abolits automaticamaing scha cumüns fusiuneschan. Schi’s renunzcha sün quist automatissem crouda davent ün obstacul per fusiuns.

Quel es gnü discutà fingià plü bod aint il grandcussagl e quel impedimaint gniss uossa aboli. La consequenza es cha’ls cumüns da vaschins existents pudessan exister eir inavant. La fracziun PLD es perinclet cun quist prüma proposta in direcziun da la refuorma dals cumüns e da las regiuns e sustegnarà la missiva da la regenza e la cumischiun. Ella ha decis d’entrar.

Christian Rathgeb, nouvelet cusglier guvernativ, ha pudü retschaiver las gratulaziuns da seis collegas illa fracziun. El ha survgni üna pastizaria in fuorma d’üna clav cun l’inscripziun "La clav dal success" accumpagnada da blers buns giavüschs.

Scharans, 2. Februar 2012

Medienmitteilung

PLD.Ils Liberals decida las parolas a Cuvglinas. Grand plaschair pro la PLD Grischun

Illa radunanza ordinaria da delegats da la PLD Grischun sun gnüdas decisas las parolas per la votumaziun dals 11 marz 2012. Preschaints d’eiran il cusglier da stadi nouv Martin Schmid ed eir il cusglier guvernativ elet la dumengia avant Christian Rathgeb. Il president da la partida Michael Pfäffli ha commentà ils resultats da quista fin d’eivna, ün grand success per la PLD Grischun.

El ha gratulà a Christian Rathgeb per sia tscherna onurifica da cusglier guvernativ. As referind sün tschertas medias ha’l critichà chi detta vuschs „chi mettan in virgulettas negativas tuot quai chi scrivan sur da la PLD Grischun e chi pretendan ün spazi enorm grand d’interpretaziun pro resultats da tschernas e votumaziuns in Grischun. Ün spazi chi ha pac da far cun emoziuns, ma chi maina in aventüras ris-chadas e nu dan pröv dal respet da la democrazia directa e las decisiuns dal suveran.“

Il cusglier guvernativ nouv Christian Rathgeb ha ingrazchà cun pleds simpatics als delegats per il grand sustegn e la bainvuglientscha dürant sia cumpagna electorala. El s’allegra ourdvart da pudair lavurer uossa aint illa regenza grischuna. Ils delegats til han ingrazchà cun ün aplaus lung.

Il cusglier da stadi nouv Martin Schmid ha respus a las dumandas dal president da la partida e quintà uschè da sias prümas experienzas a Berna. Tanter oter ha’l dit ch’el as vöglia metter aint per üna soluziun speciala da l‘imposta da plüvalur per l’hotelleria. Quella prevezza da nu trar aint per l’an 2012 ingün’imposta. Sün quist champ vöglia quai uossa acziuns, ma acziuns limitadas.

Sparti sü in trais gruppas sun gnüdas trattadas las propostas per la votumaziun, davo i’l plenum gnüdas preschantadas e vuschadas.

* Von der FDP Geschäftsleitung gefasste Parolen ...

Scharans, 30. Januar 2012
Medienmitteilung

PLD ingrazcha als votants e gratulescha a Christian Rathgeb

Cun grand plaschair e satisfacziun piglia cugnuschentscha la PLD.Ils Liberals Grischun da la tscherna clera da seis candidat Christian Rathgeb sco cusglier guvernativ. El piglia la successiun dal vegl cusglier Martin Schmid, uossa cusglier da stadi.

La PLD ha ragiunt seis böt, ella sarà air in avegnir correspunsabla per la lavur illa regenza. Quella es miss’insembel sco fin uossa. La PLD Grischun sco eir il candidat sun cuntaints da la fiduzcha e dal sustegn da la populaziun. Quai malgrà la partecipaziun debla chi d’eira da spettar.

Il comitè da la partida e la cumischiun da tscherna ingrazchan a las votantas e’ls votants per la fiduzcha granda. Per la PLD Grischun es quista fiduzcha eir la sfida per la lavur futura ed eir per la lavur da Christian Rathgeb. El realisarà eir illa regenza seis slogan Passiun per il Grischun e quai cun perseveranza e cun entusiassem. La PLD til giavüscha bler success e satisfacziun.

Scharans, 30. Januar 2012
Medienmitteilung

Sur 90% Schi a l’iniziativa Impraisas pitschnas e mezdanas IPM: PLD es fich satisfatta

Cun grand plaschair ha tut cugniziun la PLD Grischun dal bel resultat da la votumaziun d’indumengia. Cun 91% da Schi a l’iniziativa da la PLD as po discuorrer dada ün fich bel resultat. L’iniziativa IPM voul ragiundscher damain bürocrazia e reglamentaziun.

Il resultat cler muossa cha la populaziun resainta il bsögn da müdar alch. La PLD ha vis la problematica ed ha fat alch. L’iniziativa da la PLD surleivgia a tuots e sustegna las IPM Grischunas.

Uossa esa la chosa da la regenza, dal parlamaint e da l’administraziun da metter in pratcha quist bsögn.

Il prossem böt es uossa cha l’iniziativa svizra cul listess böt, lantschada da la PLD.Ils Liberals svizra, ragiundscha il quorum necessari. La PLD Grischun as mett’aint per quai.